148
menangis. Lebih banjak ia tida bisa bitjara lagi saking terharoenja ia poenja hati.
Bermoela itoe boedjang toea kira satoe machloek dari langit telah toeroen dalem kamarnja.
„Nona Mari,“ katanja, „nona Marie.“
„Kaoe tida bersalah, Bob,“ kata Marie lagi sambil pegang tangan jang goemetar dari itoe orang toea. „Akoe dateng kasi taoe bahoea kaoe merdika poela. Soeda terboekti kaoe tida bersalah. Akoe dateng ambil sama kaoe aken ganti kaoe poenja soesa sebrapa akoe bisa.“
Rogers tida bisa tahan aer matanja poen toeroet djato.
Bob, jang djadi girang dan terharoe hatinja lantaran mendenger itoe kabar, djato atas tempat tidoernja.
„Ia soeda djadi pangsan,“ kata directeur dari pendjara sembari memandang pada Bob lebih deket, „O. angdjaga, ambil satoe glas anggoer, kita kasi ia minoem sedikit anggoer, kaloe ia nanti sedar lagi.“
Sedang ini perkara terdjadi dalem pendjara, inspecteur Bernard pergi ka Clinton-street.
Tatkala ia hendak membiloek di tikoengan dari satoe djalanan, di mana ada satoe roemah makan jang terang, sekoenjoeng koenjoeng ia dapet liat, bahoea didepannja ada satoe toean, jang ia kenalin adalah Johan Goud. Bernard preksa revolvernja dan kemoedian dengen tjepat ia ikoet di blakangnja itoe toean Tapi tatkala ia membiloek di itoe tikoengan, Johan Goud soeda ilang.
Tentoelah ia soeda masoek dalem itoe roemah makan.
Dengen tida berajal lagi inspecteur Bernard masoek dalem itoe roemah makan, sasoeda ia kenalken dirinja pada djongos. Ia kasi prentah aken toetoep semoea
