157
tangan goemetar lantaran tida sabar dan hati terharoe, Clotilde boeka pintoenja itoe roemah. Apa ada orang dalem itoe roemah ? Clotilde masoek sadja. Tida ada satoe orang. Dengen tjepat Clotilde boeka pintoe kamar dalem itoe roemah.
„Emma! Anakkoe!“ katanja dengen amat girang tatkala ia liat anaknja doedoek dalem tempat tidoer sambil menangis.
Clotilde lantas gendong itoe anak, Ia inget, di segala saat bisa ada orang dateng dalem itoe roemah. Ada kadengeran tindakan mendatengin. Dengen boeroe boeroe Clotilde pakeken anaknja poenja pakean jang terletak atas satoe krosi deket itoe tempat tidoer. Dalem tempo tida brapa seconde pakerdjaan itoe soeda beres.
Waktoenja Clotilde hendak kloear dari itoe kamar bersama anaknja, ia denger ada soeara di loear djendela. Di blakang katja katja dari itoe djendela ia dapet liat satoe njonja jang berpakean perlente, jang tentoe lah boekan istrinja koeli areng jang tinggal dalem itoe roemah. Moekanja itoe njonja ditoetoep oleh kain koedoeng warna biroe.
Dengen boeroe boeroe Clotilde kloear dari itoe kamar sembari toentoen anaknja, jang djalan di sampingnja sebrapa bisa tjepat. Baroe sadja marika sampe di loear, tatkala itoe njonja dateng.
„Apa terdjadi di sini ?“ katanja „Kamana kaoe hendak bawa ini anak?“
Ia tjoba, reboet tangannja Emma jang dipegang oleh iboenja. Tapi itoe anak, jang djadi takoet boeat ini njonja asing, lantas pegang pakean iboenja. „Bawa akoe pergi, iboe. Bawa akoe pergi,“ ia mendjerit.
„Kaoe sendiri denger, ini ada anakkoe, njonja,“
