18
Clotilde telah berpaling dan toetoep moekanja sama kadoea tangannja.
„Semoea kasoesaan ini kaoe soeda pikoel dengen diam. Kasian ! Saorang diri sadja memikoel itoe kasoesaan, itoe kasengsaraan, itoe kasedihan ! Bagimana toch kaoe bisa loepaken padakoe. ... Apa memang haroes akoe diloepaken olehmoe ?“
„Djanganlah bitjara begitoe,“ Clotilde potong bitjaranja, sebab hatinja merasa ditoesoek toesoek oleh itoe perkataan perkataan.
Dengen hari jang sanget terharoe, Rogers memandang pada itoe prempoean moeda. Dadanja berombak dan ia tjoba dengen sia sia boeat semboeniken perasaan jang timboel dalem hatinja.
„Clotilde, akoe tida bisa diam lebih lama lagi. Akoe tjoba tindes perasaan hatikoe dengen sia-sia. Akoe moesti bilang pada kaoe, Clotilde, bahoea akoe tjinta sanget tjinta, pada kaoe. sadjek itoe hari pertama, jang akoe liat pada kaoe, akoe soeda tjatoh tjinta. Boekan sadja kaoe poenja kaelokan telah menarik hatikoe, hanja poen kaoe poenja hati jang moelia dab angkoeh. Clotilde, djanganlah djaoehken dirimoe dari akoe. Soeda lama kaoe moesti mengarti, bahoea akoe tjinta pada kaoe. Bahoea akoe tida bisa idoep, kaloe tida bersama sama kaoe.“
„Brentilah kolonel. Djangan bikin akoe djadi tjilaka...“
„Dengerlah, Clotilde. Dengerlah sampe akoe soeda bitjara abis. Akoe serahken nasibkoe pada kaoe. Kasilah akoe djadi ajahnja akoe poenja anak.”
Satoe djeritan sedih kaloear dari bibirnja Clotilde.
„Kolonel, akoe taro kahormatan dan perendahan besar pada kaoe, tapi selamanja akoe tida aken bisa djadi istrimoe ....“
