171
„Kaoe moesti djalan lagi sedikit“, kata lagi itoe prempoean. „Ia poenja roemah ada disana, deket menara api. Di sitoe, apa kaoe liat ?“.
Ia menoendjoek sama djarinja pada itoe roemah.
Rogers mengoetjap trima kasi pada itoe prempoean serta menoedjoe di djoeroesan jang dioendjoeken. Sasoeda djalan kira saperampat djam, ia liat pintoenja itoe roemah terboeka dan di deket sitoe tida ada kliatan barang satoe machloek berdjiwa. Inilah tida membikin herannja itoe kepala politie. Dalem waktoe seperti itoe, djarang orang bisa liat orang di djalanan sitoe. Rogers berdiri di depan pintoenja itoe roemah dan memanggil. Tapi tida ada dikasi djawaban.
Ia masoek dalem itoe roemah. Tida ada satoe orang. Tempat tidoer ketjil, jang berdiri dalem kamar, ada kosong.
Rogers doega, istrinja Harry telah bawa Emma pergi belandja. Ia berpikir, apakah ia aken menoenggoe di sitoe. Mendadak ia angkat kepalanja dan mengawasi di sakoelilingnja. Koepingnja telah dapet denger soeara lapat lapat seperti orang bertreak minta toeloeng.
Lantaran djaoenja maka ia tida bisa bedaken betoel dari mana datengnja itoe soeara. la rasanja seperti denger soearanja lebih dari satee orang. Tapi soeda pasti ada orang dalem bahaja. Rogers ambi poetoesan aken pergi doeloe dari roemanja Harry, ka mana di segala waktoe ia aken bisa kombali.
Kabetoelan matanja dapet liat itoe menara api. la seperti liat ada orang di lankan dari itoe menara. Roepanja seperti itoe orang jang minta toeloeng. Soearanja ada soeara prempoean. Kenapa itoe prempoean minta toeloeng?
Rogers soeda pergi menoedjoe ka itoe menara api,
