212
lebih legah, sekarang pergi tjari marika poenja tangkepan.
Lentera lentera menerangin deknja itoe kapal, aken tetapi tida gampang boeat kenalin saorang antara begitoe banjak orang, sekalipoen orang pake pererangan lampoe.
Tentoe sadja marika tida dapetken Vieuxtemps antara itoe orang banjak, djoega tida ada dalem podjokan podjokan dan dalem kamar, jang marika preksa semoea. Kapal soeda deket sama tepi sebrang, di mana penoempang penoempang moesti toeroen.
Salah satoe agent politie pergi pada kapitein.
„Kapitein, kita ada bawa satoe pendjahat, Goud atawa Vieuxtemps namanja,“ kata itoe agent. „Kita telah bawa ia toeroen dalem ini kapal, tapi tempo itoe kariboetan ia telah terpisah dari kita. Kita moesti dapetken ia kombali. la tentoe ada dalem ini kapal.“
„Kaloe ia soeda toeroen, tentoe ia masih ada“, djawab itoe kapitein. „Tjari padanja dan djangan kasi ia lari.“
„Kita minta pada kaoe aken toeloeng pada kita dengen soeroe penoempang penoempang toeroen dari kapal dengen satoe per satoe.“
„Baek,“ kata itoe kapitein lagi. „Kaloe kaoe poenja tangkepan ada dalem kapal, ia tentoe tida aken lolos.“
Itoe kapitein lantas kasi prentah aken pake tangga besi jang ketjil boeat penoempang penoempang toeroen, lantaran mana marika djadi kepaksa toeroen dengen satoe per satoe.
Matros matros djalanken itoe prentah dengen teliti tatkala itoe kapal soeda rapet di pinggir dan agent agent politie berdiri di kadoea belah dari itoe djembatan ketjil, di mana sasoeatoe penoempang moesti
