216
„Bilanglah!“
„Ada satoe atoeran bagoes, jang kaoe kasi tempat tinggal pada itoe prempoean. Akoe kasi slamat pada kaoe dengen itoe pikiran bagoes. Tapi, biarlah akoe tjeritaken akoe poenja voorstel. Djangan kasi ia kloear, kolonel, tahan ia dalem kaoe poenja roemah dan soeroe intip segala perboeatannja, zonder ia dapet taoe. Akoe pertjaja, tjara begini kita gampang sekali bisa dapet tangkep lagi itoe bangsat, jang kemaren lari.“
Rogers diam.
„Kaoe liat, kita beroeroesan dengen satoe pendjahat jang tjerdik,“ kata Bernard lagi. „Tapi kita ada pegang ia poenja istri jang pertama. Itoe bangsat tentoe aken kasi tanda tanda pada istrinja itoe. Ia aken berhoeboeng sama itoe prempoean . . . . Djadi, kaoe berdjandji padakoe, aken berlakoe awas?“
„Akoe nanti bikin begitoe, pertjajalah !“
„Dan sekarang marilah kita bitjaraken itoe prempoean asing. Kaoe bilang, tida bisa djadi ia itoe ada Vieuxtemps poenja istri jang pertama. Abis, siapa adanja itoe prempoean?“
„Djoestroe itoe jang belon dapet diketahoei. Apa kaoe soeda soeroe tahan itoe prempoean?“
„Akoe nanti sigra ambil atoeran atoeran aken tangkep padanja.“
„Ini ada djalan satoe satoenja aken dapet katerangan“, kata Rogers, „Tapi akoe koeatir, ini tida aken bawa kita lebi djaoe, inspecteur. Ia tida nanti maoe bitjara. Ia nanti brangkali tjeritaken, bahoea ia ada mempoenjai perhoeboengan resia sama itoe toean Goud jang kaja, bahoea ia djadi gendaknja. . . .“
„Akoe nanti soeroe kepoeng ia poenja tempat tinggal waktoe ia tida ada di roemah dan kita nanti liat, apa
