217
nanti kasoedahansja ini atoeran”, djawab Bernard.
„Kaoe maoe bilang.....”
„Bahoea Vieuxtemps nanti dateng di sitoe? Tida, akoe tida pertjaja begitoe. Boeat itoe ia ada terlaloe tjerdik. Tapi kita brangkali aken bisa dapet katerangan katerangan, jang bisa berharga boeat kita”.
„Namanja poen kita tida taoe, inspecteur”.
„Dalem hal ini, ia poenja nama tida ada pentingnja. Ada gampang sekali boeat pake nama palsoe. Satoe hal soeda pasti, jaitoe ia soeda lama berhoeboeng dengen Vieuxtemps Sekarang poen ia masi berhoeboeng, sebab kaoe tjeritaken, menoeroet katanja Vieuxtemps poenja istri, itoe prempoean jang telah serahken ia poenja anak pada Goud dan ini Goud kasiken poela itoe anak pada laen orang.....“
„Satoe boekti bagoes, bahoea itoe prempoean jang pake koedoeng biroe boekannja njonja Vieuxtemps, sebab itoe prempoean telah rampas itoe njonja poenja anak.“
„Soenggoeh ada penting sekali aken kita ketahoei sedikit tentang ini prempoean asing jang moelai djalanken rol penting dalem ini perkara, kolonel.“
„Apa kaoe pergi ka sana?“
„Akoe nanti sigra pergi pada agent politie, jang djaga di ia poenja djalanan. Ia tentoe kenal itoe prempoean".
„Akoe toeroet sama kaoe“, kata Rogers.
Itoe doea toean kloear dari kantor politie dan naek kreta pergi ka djalanan, di mana itoe prempoean tinggal.
Sasampenja di itoe djalanan, marika toeroen dari kandaraan dan tjari agent jang diwadjibken mendjaga di sitoe. Itoe agent, jang soeda lama mendjaga di satoe tempat itoe sadja, djadi sama sadja dengen boekoe adres jang berdjiwa. Marika kenal semoea
