221
teng di saat jang tida baek.“
„Sampepoen soerat atawa tanda paling ketjil jang bisa mentjoerigaken, tida ada kedapetan,“ kata Rogers.
„Akoe soeda ambil poetoesankoe. kolonel,“ itoe inspecteur kata lagi.
„Apa kaoe maoe bikin ?“
„Tinggal di sini dan mengintip.“
„Ja, ini ada paling baek. Tapi hati hati, kaoe taoe sama siapa kaoe beroeroesan.“
Bernard ketawa menghina dan kasi liat ia poenja revolver, jang ia taro atas medja dalem kamar, jang marika pertama masoekin.
„Kaoe kenal akoe. Akoe tida gegabah.“
„Apa kaoe maoe depet bantoean dari agent agent politie ?“ tanja itoe kolonel.
„Tida perloe. Agent agent aken menarik orang poenja pikiran,“ djawab Bernard. „Sebagimana kaoe taoe, akoe pertjaja pada dirikoe sendiri.“
„kaloe begitoe, akoe tinggal kaoe di sini dan aken bikin papreksaan sendiri. Akoe harep kaoe dapet tangkepan jang baek, inspecteur.“
„kaloe itoe prempoean jang pake kain koedoeng, dateng di sini, akoe pegang padanja dan toenggoe. Itoe boeroeng jang laen brangkali aken kena ditangkep djoega. Akoe soeda bisa bikin tangkepan tangkepan lebih penting dengen djalan begini. Tapi, hati-hati, apabila kaoe berlaloe dari sini, soepaja kaoe tida dapet diliat oleh moesoe kita.“
„Akoe nanti pergi djalan pintoe laen. Ini ada satoe atoeran bagoes. Ini roemah mempoenjai doea pintoe. ... Djadi, slamat tinggal dan moedahan kaoe dapet hasil bagoes.“
Itoe doea sobat berpisah dari satoe sama laen.
