222
Rogers kloear dari itoe kamar dengen pelahan dan toeroen dari tangga dengen tida ada ketemoeken barang satoe orang.
Sasampenja di bawah ia menjebrang pekarangan dalem, kloear dari pintoe blakang dan sampe di satoe djalanan laen.
Dengen satoe kali memandang ia soeda dapet taoe, bahoea tida satoe orang ada perhatiken padanja dan ia mengilang di antara orang banjak.
Samentara itoe Bernard menoenggoe dalem kamarnja itoe prempoean jang tida terkenal. la boeka ia poenja overjas, boeka topinja dan doedoek atas satoe krosi deket medja, atas mana ia telah taro ia poenja revolver.
Kemoedian ia menoenggoe dengen kesabaran, jang memang djadi ia poenja salah satoe sifat.
Itoe prempoean jang pake koedoeng biroe, tida bisa doega, bahoea orang pasang satoe pikatan dalem ia poenja kamar sendiri. Djoega Bernard harep, ia sigra aken dateng.
Aken tetapi, bebrapa djam soeda liwat, tida satoe orang ada dateng. Hari soeda moelai gelap.
Bernard memandang di sakiternja. la perloe sama penerangan.
Atas satoe medja ketjil ia ada liat satoe lampoe.
Tapi, itoe api tida boleh diliat orang dari djalanan.
Sasoeda berpikir sabentar ia dapet satoe djalan. la aken toeroenken klamboe klamboe jang besar dan tebal dari djendela djendela.
Orang tida aken dapet liat itoe klamboe klamboe dari bawah dan tjahaja api tida aken bisa menemboes itoe klamboe klamboe.
