224
nja revolver, tapi itoe prempoean tida kasi itoe tempo.
Bernard liat ia hampirken padanja dan, berbareng dengen itoe, ia merasa kepalanja sakit keras.
Dengen satoe barang keras dan tadjem, jang ia tida bisa liat di dalem gelap, itoe prempoean telah poekoel padanja, hingga Bernard mengarti perkataan perkataannja itoe agent politie, tatkala ia ini bilang bahoea itoe prempoean ada satoe toekang naek koeda jang mempoenjai tenaga loear biasa.
Sabelonnja sampe di medja, Bernard djadi sempojongan dan djato tjelentang dengen pangsan. Ia tjoba bangoen, tapi djatoh poela.
Bernard soeda tida berdaja lagi. Itoe prempoean telah bekerdja lebih tjepat dari dia Ia telah tida dapet tempo boeat membela diri atawa boeat mendjerit.
Satoe ketawa menghina kadengeran dalem itoe kamar gelap.
„Siapa adanja kaoe dan apa kaoe tjari di sini?“" kata itoe prempoean sambil boeka koedoengnja dan bongkoken badannja memandang itoe detective. „Kalde? Pendeknja, ini aken kasi peladjaran pada kaoe aken laen kali lebih berhati hati. Kenapa kaoe mengganggoe padakoe? Apa akoe ada tjampoer kaoe poenja oeroesan? Dan kenapa kaoe sampe mengintip akoe dalem roemahkoe sendiri, seperti akoe djadi pendjahat?“
Itoe koetika itoe prempoean dapet pikiran, brangkali deket di sitoe ada agent agent politie. Sebab ia tida soeka ketemoe dengen itoe orang orang politie dan ia tida berasa slamat dalem roemahnja, maka ia pake poela ia poenja koe loeng dan brangkat dengen boeroe boeroe.
