230
ditoedjoe oleh itoe komedi koeda. Rogers ambil salah satoe djalan itoe dan kerasken djalan koedanja lantaran mana di waktoe malem ia soeda sampe di York. Di sepandjang djalan ia berlakoe awas betoel, sebab ia harep aken ketemoeken Clotilde.
Sasampenja di roemah roemah, jang pertama Rogers soeda moelai tanja katerangan katerangan. Tapi ia tida dapet denger soeatoe apa tentang Clotilde. Ia tjoema denger satoe komedi koeda, jang aken bikin pertoendjoekan pertoendjoekan, ada mondok di laen bagian dari kota York.
Rogers pertjaja pasti itoe komedi koeda adalah jang ditjari oleh Clotilde. Sebab itoe orang politie pertjaja, di sitoe ia nanti ketemoeken Emma, maka ia soeroe bawa koedanja dalem stal dari satoe losmen dan dengen djalan kaki ia melantjong dalem itoe kota.
Diterangin oleh sinarnja boelan ia sigra dapet liat itoe komedi koeda, jang soeda sedia boeat menerima datengnja penonton.
Atas satoe tameng besar dari kaen ada ditoelis dengen letter letter besar: CIRCUS BUMPO. Di segala pendjoeroe orang liat orang orang lelaki dan prempoean dari itoe koempoelan komedi koeda.
Rogers hampirken pada marika.
„Siapa eigenaarnja ini circus ?" ia menanja.
„Directeur Bumpo," djawab salah saorang itoe.
„Dan directeur Bumpo adalah akoe. Kenapa kaoe tanja begitoe?"
„Kaoe liat siapa adanja akoe ?" kata itoe kolonel sambil kasi oendjoek ia poenja medaille.
Itoe directeur angkat poendaknja seperti orang jang tida perdoelian.
