250
„Malem baek, toean. Sekarang soeda malem dan akoe takoet di djalanan. Apa kaoe maoe kasi tempat menginep boeat ini malem?“
la kloearken ia poenja oewang jang pengabisan dari dompetnja.
„Ka mana kaoe maoe pergi? Kaoe maoe pergi lebih djaoe lagi?" tanya Schultz
„Akoe pergi ka York."
„Kaloe begitoe, kaoe poenja perdjalanan tida djaoe lagi."
„Akoe tjari akoe poenja anak"
„Dan apa kaoe maoe menginep di sini ?"
Clotilde mendjawab ja dan taro ia poenja oewang atas medja.
„Simpen toch kaoe poenja oewang,"kata Schultz. „Tida perloe begitoe boeroe boeroe. Kapan kaoe maoe menginep dalem ini losmen, kaoe boleh tinggal dalem ini kamar besar. Laen kamar semoea ada tamoenja. Di sini ada satoe rustbank toea, di mana kaoe bisa tidoer. Kapan kaoe soeka akoe nanti bawaken sedikit makanan.“
Itoe toekang losmen jang tjerdik pikir, itoe toean jang roepanja sanget hartawan, tentoe aken soeka bajar harganja segala apa jang dimakan oleh itoe prempoean.
Sedeng Clotilde doedoek di pinggir medja, atas mana ada satoe lampoe, itoe toekang losmen dateng bawa roti, ham dan mentega serta satoe glas anggoer. Ia memandang pada itoe prempoean moeda jang tjantik jang dengen koeatir menanja, apakah harganja itoe makanan tida lebih dari jang ia bisa bajar.
„Makan sadja, perkara ketjil,“ kata Schultz dengen soeara njaring, hingga Vieuxtemps gampang bisa de-
