28
boleh mengganti sekalian hak hak akoe. Akoe nanti pergi djaoe, djaoe sekali aken djangan menggangoe kaoe poenja oentoeng.
Alfred, kaoe aken toeroetken permoehoenankoe. Kita berdoea poenja peroentoengan sekarang terantjem. Kaloe kaoe toelak permoehoenankoe, akoe ada mempoenjai ka-kaoeasaan boeat paksa pada kaoe. Dan kaoe taoe, hoekoeman apa aken didapet oleh orang jang mempoenjai doea istri.
Kaoe aken loeloesken permoehoenankoe, boekan ?
Besok, di waktoe lohor, akoe aken dateng di roemahmoe dan tawarken pakerdjaankoe pada istrimoe.
Selaennja itoe, akoe serahken sadja pada kaoe poenja katjerdikan. Kaoe bisa bikin segala apa boeat bikin berhasilnja kita poenja maksoed.
Kaloe soeda begitoe, nanti moelai perklaian bereboet hak dan tjinta.
Istrimoe jang tjilaka dan ditinggalken saorang diri.
Clotilde.“
Tatkala soeda abis menoelis ini soerat, Clotilde mengeloeh. Djadi besok ia aken berdepan dengen itoe soeami, jang soeda bebrapa taon lamanja ia tida liat.
Esok harinja ia aken minta pakerdjaan jang rendah dari saorang prempoean, jang telah ambil ia poenja hak hak jang sah menoeroet wet.
Clotilde kaget tatkala ia batja poela soertatnja.
Salah satoe dari itoe doea orang prempoean moesti kalah dalem ini perklaian.
