265
poedjian besar dari publiek.
Sabelonnja masoek dalem circus, Astrella panggil Emma jang dengen goemetar dan takoet dateng padanja.
„Akoe nanti bakar kaoe sama ini besi panas, kaloe kaoe tida toeroet semoea apa jang akoe nanti prentah,“ katanja pada itoe anak, „Hati hati, kaloe kaoe menangis. Kaoe selaloe moesti ketawa. Ketawa ajo, lekas.“
Itoe anak paksa sebrapa bisa boeat tahan ia poenja aer mata dan tjoba ketawa.
„Dan hati hati, kaloe kaoe takoet, apabila bara bara nanti djatoh dan akoe pegang pada kaoe. Kaoe moesti ketawa, apabila itoe bara bara djatoh di sakitermoe.“
Lontjeng diboeniken. Inilah tandanja nona Astrella moesti maen.
Astrella bersama Emma naek atas satoe bankoe ketjil.
„Ketawa“, ia bisikin itoe anak, dan ia sendiri ketawa, sedeng dari seloeroeh badannja kloear bara bara api listrik.
Itoe anak, jang dikiterin oleh api dan tida brentinja kena ditoesoek oleh kakoeatan listrik, djadi amat ketakoetan. Ia tida bisa tjegah jang ia achirnja djadi goemetar.
Tapi, maskipoen penonton liat itoe anak goemetar, toch marika tida perhatiken, sebab semoea mata ditoedjoeken pada Astrella jang seperti mandi dalem sinar terang.
Mendadak kadengeran djeritan keras dalem itoe circus. Soeara jang mendjerit itoe adalah soearanja orang prempoean.
Di bagian paling blakang dari itoe circus djadi terbit kariboetan, tapi laen laen penonton, jang djadi amat
