278
„Soeara manoesia. Ada saorang prempoean jang disiksa. Apa kaoe denger? Itoe soeara roepanja kloear dari itoe roemah besar. Kita moesti preksa,“ kata Rogers sambil toeroen dari koedanja, jang ia iket di satoe tjintjin di tembok stal.
Bernard poen berlakoe begitoe dan marika berdoea boeroe boeroe pergi ka itoe roemah dengan berniat tetap aken tjari taoe, kenapa itoe prempoean mendjerit-djerit begitoe sedih.
Itoe roemah besar terboeka. Rogers dan Bernard teroes menoedjoe ka pintoe kamar, dari mana itoe djeritan, Marika denger satoe soeara bertjampoer dengen itoe soeara treakan dari satoe soeara jang mirip dengen boeninja tjamboek.
Kolonel Rogers boeka itoe pintoe dan itoe doea orang politie lantas dapet liat satoe pemandangan ngeri.
Di tengahnja satoe kamar jang diperabotin bagoes ada berloetoet saorang prempoean moeda. Di depannja ada berdiri saorang laki jang koeat. Koelitnja bruin lantaran dibakar matabari. Moekanja merah minoem minoeman keras.
Ia poenja mata jang tida tetap seperti kloear matanja. Ia poenja moeka jang kedjam soeda tida karoean roepa lagi lantaran marah. Dengen tida kasian pada itoe prempoean moeda jang tjantik, ia ajoen tjamboeknja, seperti jang biasa dipake oleh toean toean kebon boeat paksa koeli koeli koelit item bekerdja.
Itoe tjamboek jang diajoen, djatoh atlas poendaknja itoe prempoean tjilaka jang berloetoet.
Itoe orang telaki doeloenja ada mempoenjai satoe kebon di Amerika Selatan. Di sitoe ia telah beladjar kabiasaan kabiasaan, jang hawa alcohol robah saban hari djadi amarah besar.
