279
Sasaat lamanja itoe doea orang politie djadi kaget lantaran meliat itoe pemandangan jang kedjam dan tida terdoega. Kemoedian dengen goesar marika masoek dalem itoe kamar.
„Brenti !“ Bernard bertreak. „Apa kaoe bikin? Jang sekarang kaoe poekoel ada saorang prempoean jang lemah.“
Dengen aseran Lincoln menoleh dan toedjoeken pada itoe toean toean ia poenja mata, jang bersorot boeas lantaran amarah dan alcohol.
„Siapa kasi idzin pada kaoe aken masoek di sini ?“ katanja. „Persetan, apa kaoe tjari di sini? Pergi dari roemahkoe, kaloe tida akoe oesir kaoe pergi dengen ini tjamboek.“
„Kaoe tida aken brani berlakoe begitoe,“ djawab Rogers dengen sabar. „Akoe kepala dari politie di New York.“
„Kepala dari politie ? Apa akoe perdoeli, Akoe djadi toean dalem roemahkoe. Djangan ganggoe sama akoe, kaloe tida akoe lempar kaoe kloear pintoe.“
Ia ajoen poela tjamboeknja boeat poekoel itoe prempoean jang masi teroes beloetoet.
Kesabarannja itoe kolonel sekarang soeda abis. Dengen doea tindakan ia soeda berada deket sama Lincoln. Sama tangannja jang koeat ia pegang itoe orang boeas, hingga dalem sakedjepan mata tjamboeknja soeda terampas. Dengen sanget moerka ia melawan sakerasnja. Tapi ia poenja treakan treakan dan amarah membikin koerang kakoeatannja, hingga Rogers angkat la seperti satoe anak ketjil.
„Kaloe kaoe tida diam, akoe banting kaoe di tanah sampe antjoer. Kaoe tida maloe boeat memoekoel saorang prempoean ?“ kata Rogers seraja lempar itoe
