282
„Kenapa tida? Roemah boeat orang asing ada sedia boeat kaoe. Akoe soeka kasi tempat mondok.“
„Apa kemaren atawa tadi pagi kaoe ada liat saorang prempoean jang pake koedoeng biroe, toean Lincoln ?“
„Saorang prempoean jang pake koedoeng biroe? Tida.“
„Saorang anak komedi, jang pergi kasana sini dan seboet namanja Astrella?“
„Tida, toean, tida.“
„Dan saorang laki jang lari, jang tjoba semboeniken dirinja?“
„Djoega tida.“
„Brangkali ia belon sampe di sini.“
„Kaoe tjari dia?“
„Kita maoe menoenggoe dia di sini.“
„Tinggal sadja sabegitoe lama kaoe, maoe, Tapi itoe jang laen.....“
„Itoe kolonel ada saorang jang berboedi, toean Lincoln.“
„Ia telah menjerang akoe.....“
„Djangan dendam sakit hati. Kaloe kaoe soeda pikir tentang hal itoe, tentoelah kaoe poenja pikiran nanti berobah laen sekali. Kaoe kasi djoega tempat boeat menginep pada itoe kolonel, boekan?“
„Ja, lantaran kaoe. . . . .“
Samentara itoe kolonel Rogers, jang telah anter Henriette ka kamar di seblahnja kamar Lincoln, berada dalem satoe keadaan jang sanget tida enak.
Tatkala itoe prempoean moeda berada saorang diri sadja sama itoe kolonel, ia lantas pegang tangannja Rogers dan tjioem itoe dengen bernapsoe. Katjintaan keras mendadak timboel dalem hatinja bagi itoe orang jang telah menoeloeng padanja.
