293
maka ia doedoek di sitoe dengen lajangken pikirannja sadjaoe djaoenja.
Rogers moesti pergi padanja. Ia moesti bitjara padanja. Tatkala Clotilde liat padanja, ia hendak pergi, tapi ditahan oleh Rogers.
„Djangan tida maoe kasi ini kagirangan padakoe, marilah akoe bilang, bagimana sanget menesel adanja akoe jang akoe soeda bikin kaoe soesah hati. Katjintaankoe jalah jang mendjadi sebab.”
„Sekarang kaoe soeda taoe,” djawab Clotilde dengen pelahan. „Akoe toelis semoea atas kertas, sebab akoe tida ada kebranian boeat mengakoe dengen moeloet.”
„Clotilde,” kata Rogers sambil pegang tangannja itoe prempoean moeda. „Djangan toelak akoe. Akoe nanti djadi terlaloe tjilaka. Kasilah akoe kasiken padamoe semoea katjintaankoe.”
Dengen pelahan Clotilde lepasken tangannja dari pegangannja itoe kepala politie.
„Akoe moehoen pada kaoe, Rogers, kasilah akoe pergi, akoe merasa bahoea akoe tida ada mempoenjai itoe kakoeasaan boeat kasi padamoe itoe kebroentoengan jang kaoe maoe.”
„Djangan kata begitoe,” djawabnja dengen bernapsoe. „Kaoe saorang sadja bisa kaboelken semoea harepan, semoea impiankoe. Akoe soeda tjinta pada kaoe sedari akoe bermoela liat padamoe.”
Demikian Rogers bitjara teroes dengen tida liat, bahoea ada saorang meliwatin dia. Itoe otang mengintip padanja dan soeda denger tiap tiap patah dari bitjaranja
„Apa kaoe tida inget, bahoea pada soeatoe malem kaoe mengakoe ada tjinta padakoe?” kata Rogers lebih
