314
Vieuxtemps tinggalken ia sendirian. Akoe soesoel itoe prempoean dan ia tjerita, soeaminja ada satoe anak komedi dan aken kasi pertoendjoekan di satoe kota ketjil deket sini. Kasana itoe prempoean nanti soesoel soeaminja.“
„Kenapa ia tida pergi ka itoe roemah toean tanah?“
„Ia hendak menoenggoe soeaminja di sitoe.“
„Ia telah tjeritaken itoe semoea melaenkan dengen maksoed boeat tipoe padamoe.“
„Itoelah akoe tida bisa pertjaja.“
„Tapi di sana ada kolonel dan inspecteur Bernard.“
Di oedjoeng djalan, jang diterangin oleh matahari jang hendak silem, ada mendatengin doea toean toean. Marika soesoel itoe doea agent politie.
„Kabetoelan sekali.“ pikirnja Nell.
„Sekarang kaoe maoe pergi kamana?“ tanja kawannja Nell pada Fox
„Ka itoe roemah toean tanah. Akoe kepingin taoe apakah itoe prempoean jang pake koedoenng biroe tida ada disitoe.“
Itoe doea kapala politie soeda dateng lebih deket.
„Siapa itoe?“ tanja Bernard.
„Ia ini adalah itoe klontong, tentang siapa akoe soeda tjeritaken.“
„Djangan toch begitoe gampang pertjaja pada sembarang orang.“
Fox mesem waktoe denger itoe perkataan perkataan.
„Toean,“ katanja, „romankoe tida sampoerna, tapi akoe tida mendjoesta dan menipoe, tida, selamanja tida.“
Rogers soeda toeroen dari koedanja.
„Kaoe bilang, itoe nona dan Vieuxteps ada dalem ini bilangan?“ tanja Rogers.
