323
dari kaoe poenja anak. Ini prempoean ada satoe machloek berbahaja.”
„Apa kaoe tida maoe lantas pergi?" tanja Henriette. „Sekarang soeda djam sabelas dan soeamikoe sigra aken pergi ka kamarnja.”
„Baeklah, akoe pergi.”
„Lekas, boroe boroe.”
„Pergilah doeloe ka roemah besar dan toenggoe di sana dalem satoe kamar jang berdamping dengen kamar makan,” djawab Clotilde.
„Kaoe nanti dateng, boekan? Akoe harep padamoe ... sebrapa bisa lekas.”
„Akoe sigra ikoet padamoe.”
Henriette poenja maksoed soeda diatoer. Sedeng Clotilde beromong omong sama Lincoln dalem kamar makan, ia nanti boeroe boeroe kombali ka roemah ketjil dan bawa lari Emma sampe di roemah jang katiga sebagimana ia soeda berdjandji.
Di sitoe ia nanti serahken itoe anak pada saorang lelaki, sobatnja itoe nona jang baroe dateng. Baeklah, akoe pergi,” kata Henriette lagi. „Akoe toenggoe padamoe.”
Clotilde berpikir beberapa saat.
Ia toenggoe sampe Henriette soeda pergi.
Djoega Clotilde soeda ambil satoe poetoesan.
Sedeng Henriette poelang ka roemahnja, Clotilde pergi ka tempat tidoer anaknja dan boeroe boeroe pakein itoe anak.
Ia moesti sigra pergi dari sitoe. Ia moesti lolosken dirinja dari tangannja ini prempoean jang niat bikin djilaka padanja.
Dengen gendong anaknja. Clotilde pergi ka djendela.
Di sakiternja ada sepi sekali.
