351
satoe pertiga. Boeat saorang miskin seperti akoe, djandji itoe menarik hati sanget, oewang ada begitoe banjak, hingga dengen itoe akoe bisa idoep senang sampe mati. Tatkala itoe . . . . . akoe lakoeken itoe pakerdjaan . . . . .“
Vieuxtemps berpaling sabentar.
Evans bitjara teroes dengen pelahan :
„Akoe nanti tjeritaken, bagimana doedoeknja itoe perkara. Denger! Pada soeatoe malem, jang angin riboet ada toeroen, kita bertiga masoek dalem goedang goedangnja si soedagar areng. Silver ada bawa koentji dari kas ketjil, djadi ini kas gampang sadja diboeka. Tapi lemari besi jang besar tida dapet kita boeka Kita bertiga laloe angkat itoe lemari. Kemoedian Harry panggil satoe kreta. Kita naeken itoe lemari dalem kreta dan djalan pergi. Silver ada bawa pekakas, dengen mana ia bisa boeka itoe lemari. Sanget banjak oewang kertas ada di dalemnja. Apa tjilaka itoe doea bangsat lantas bereboet ambil. Akoe dapet tjoema sedikit. Bangsat betoel!“
„Apa orang tjari padamoe?“
„Akoe kira dan kaloe orang dapet tangkep, akoe bisa dapet nasib jang tida terlaloe bagoes.“
„Kerdja paksa ?“
„Brangkali.“
„Dan itoe doea orang?“
„Marika soeda toeroet akoe poenja toeladan, marika sigra lari.“
„Sekarang akoe senang, kaoe tida aken adoeken akoe pada politie," kata Vieuxtemps dengen mesam.
„Kita tida aken berchianat pada satoe sama laen, sobat,“ djawab Evans. „Kita aken djadi sobat betoel.“
„Ah, tjoba akoe tadi taoe begitoe,“ kata Vieuxtemps.
