357
Ia bitjara sama njonja hotel di bagian paling blakang dari itoe gang.
„Toeloeng soeamikoe, toeloeng akoe,“ itoe prempoean memoehoen.„Politie soeda ada dibawah, Kemaren akoe soeda tjeritaken, orang taro sangkaan kliroe pada kita, orang tjari pada kita dan kita maoe lari.“
„Di mana adanja kaoe poenja soeami ?“ tanja njonja hotel.
„Dibawah, ia soeda semboeni dibawah.“
„Toeroet sama akoe, akoe nanti atoer semoea.“
„Apa politie ada di blakang roemah ?“
„Tida, politie masih ada dalem kamar besar dan kaoe ada tempo boeat lari.“
Evans denger, itoe doea orang prempoean berlaloe.
Djadi Vieuxtemps soeda pergi. Sekarang ia moesti pikir boeat singkirken dirinja sendiri.
Sigra ia dapet satoe pikiran bagoes, jang boekan sadja moesti toeloeng padanja, hanja poen aken bikin ia bisa soesoel Vieuxtemps. la aken ikoetin djalannja itoe prempoean jang pake koedoeng, jang tentoe anter soeaminja dan ini soeami, Evans pikir, tentoe tida laen dari Vieuxtemps.
Tapi, apakah ini prempoean betoel njonja Goud? Dari mana ia dateng? Brangkali ia tjoema gendaknja itoe bangsat, jang ditjari oleh politie.
Itoe goeroe sekola toeroen dari loteng.
Agent agent politie tida ada dalem kamar besar, tapi di segala saat marika bisa dateng di sitoe.
Ia liat, njonja hotel boeka satoe pintoe ketjil, jang pernanja di bagian blakang dari Itoe hotel. Itoe prempoean jang pake koedoeng kloear dari itoe pintoe.
Njonja hotel kemoedian toetoep itoe pintoe dan kombali pada tetamoe tetamoenja.
