39
Djadi, ini prempoean, jang idoep dengen makmoer,djoega ada mengandoeng soesah hati.
„Apa kaoe tida maoe toenggoe sabentar?" katanja lagi. „Soeamikoe sigra poelang. la kepingin adjar kenal sama kaoe "
Clotilde diam boeat semboeniken hatinja jang terharoe.
„Akoe aken sanget beroentoeng, njonja, kaloe akoe dikasi adjar kenal sama soeamimoe, tapi idzinkenlah akoe sekarang brangkat. Besok akoe aken dateng pada djam jang ditentoeken."
la berdiri, pamitan dan berlaloe dari itoe kamar.
Baroe sadja ia toetoep pintoenja itoe kamar, ia lantas moesti bersender di tembok, sebab mendadak antero badannja djadi lemas.
Djadi, itoelah adanja itoe prempoean, boeat siapa soeaminja telah loepaken dia. Bagimana sanget Clotilde bentji pada itoe prempoean. Toch ia merasa kasian djoega sama prempoean itoe, jang pada soeatoe hari nanti moesti insaf dirinja ditipoe.
Besok Clotilde aken ketemoe djoega sama soeaminja, sasoeda berpisah sekian taon lamanja. Kasanain Clotilde aken bersama sama soéaminja dan itoe prempoean dalem satoe roemah.
Clotilde telah sampe di tangga tatkala satoe toean jang berpakean perlente ketemoe padanja. Mendadak itoe toean bertindak moendoer dan memandang pada itoe prempoean elok.
„Clotilde. Clotilde. Istrikoe." katanja seraja oeloerken. kadoea tangannja.
„Alfred. Soeami jang tida setia." kadengeran dari bibirnja itoe prempoean elok.
Lantaran ini pertemoean jang sekoenjoeng koenjoeng maka Clotilde poen moendoer bebrapa tindak.
