383
jang orang hargaken marika poenja pembrian.“
„Kaoe taoe, akoe tida soeka sama barang barang begini.“
„Pakelah ini gelang, akoe moehoen begitoe, gravin!“ Clotilde ketawa.
„Kaoe tida bisa mengarti rasa bangga dari ini millionnair millionnair Amerika. Kaoe tida bisa mengarti bagimana beroentoeng kaoe bikin marika itoe dengen pake apa pembriannja. Pakelah itoe gelang, kasi ia itoe kasenangan, kaoe tida aken djadi tjilaka lantaran itoe.“
„Akoe aken toeroet kaoe poenja nasehat,“ djawab Clotilde. „Akoe selaloe beroentoeng dengen menoeroet kaoe poenja nasehat. Soeda delapan hari kita orang disini dan begimana besar adanja perobahan dalem pengidoepan kita. Ampir tida bisa dipertjaja.“
„Ja, tapi kaoe poenja soeara djoega begitoe bagoes.“
„Moedahan Allah toeloeng pada kita,“ djawab Clotilde. Ia angsoerken tangannja pada Scherer.
„Tjoba kaoe taoe, apa jang akoe selaloe inget,“ kata ini bekas toekang tjoekoer.
„Apa dan?“
„Akoe pikir, tjoba graaf Limburgh dan njonja gravin bisa liat pada kaoe, marika tentoe aken djadi kagoem.“
Clotilde sekap tangannja.
„Iboekoe selamanja tida aken liat akoe lagi,“ ia mengeloeh. „Ia soeda pergi boeat selama lamanja. Ia soeda bikin perdjalanan, dari mana kita orang selamanja tida kombali lagi. Dan akoe digoda oleh rasa menesal....“
„Tapi toean graaf masih idoep....“
„Siapa taoe? Ajahkoe soeda oesir akoe. Saoemoer idoepkoe akoe aken moesti mengoembara dan tida ada mempoenjai tempat tinggal.“
