55
„Di mana adanja itoe toean ?“ Alfred menanja de-
ngen soeara ketoes pada boedjangnja.
„Di kamar besar.“
Dengen tida berpikir lagi Alfred lantas kloear dari itoe kamar makan aken pergi ka kamar besar, di mana ia ketemoe sama inspecteur Bernard jang, seperti biasa, memake pakean preman. Itoe orang politie mendjoera dan kemoedian, seperti biasa, memandang dengen tadjem pada toean roemah jang masoek dalem itoe kamar.
„Toean Goud,“ katanja, „akoe moesti kasi taoe sabentar padamoe tentang satoe perkara sedih. Njonja Goud, istrimoe, djadi anak dan achliwaris jang toenggal dari toean Smith. Akoe diwadjibken boeat minta pada kaoe, soepaja dengen hati-hati kaoe sampeken padanja satoe kabar jang aken sanget membikin terharoe hatinja“.
„Itoe kabar jang kaoe maksoedken, kita soeda taoe, dan kabar itoe sasoenggoehnja soeda bikin sanget terharoe hatinja istrikoe, hingga ia djadi pangsan,“ djawab Alfred. „Tapi, tjobalah tjeritaken sabentar, kenapa kita baroe trima itoe kabar, sasoeda ia disiarken
di djalanan djalanan.“
„Boeat samentara waktoe akoe tida boleh mendjawab atas kaoe poenja pertanjaan, toean Goud. Ada hal hal jang bikin perloe kita larang sasoeatoe orang masoek dalem roemah di-mana soeda dilakoeken itoe pemboenoean.“
„Kaoe maoe bilang, orang moesti preksa doeloe keadaan dalem itoe roemah. Tapi ini toch bagi Bob, boedjang jang soeda toea dari mertoeakoe, tida mendjadi halangan aken ia britaoeken kedjadian itoe pada kita. Akoe moesti mengakoe, akoe sanget tida senang dan tida bisa mengarti ini kelakoean.“
„Ada hal hal, toean, dalem mana orang kepaksa
