61
DI DEPAN MAIT.
Ini pemboenoean, jang dilakoeken di tenganja wijk dari orang orang jang paling hartawan di New York, telah menerbitken kaheranan besar, teroetama sebab toean Smith ada saorang jang sanget terkenal dan antero perkara itoe ada gelap sekali.
Roemahnja itoe millionnair, sebagimana inspecteur Bernard soeda bilang, telah ditoetoep rapet dari bawah sampe di atas. Dalem itoe roemah ada bebrapa agent politie, toekang preksa mait dan satoe secretaris.
Selaennja ini orang orang ada djoega boedjang jang soeda toea, Bob namanja. Soeda bebrapa taon lamanja ia tinggal dalem itoe roemah.
Toean Smith, brangkali kerna ia mempoenjai kakajang sanget besar, ada mempoenjai bebrapa adat loear biasa, jang disebabken oleh ia poenja rasa tjemboeroe pada segala orang. Sasoeda Marie menikah, ia ambil poétoesan aken lepas boedjang boedjangnja jang banjak, katjoeali Bob saorang. Demikianlah ia djadi tinggal dalem roemahnja tjoema berdoea dengen itoe boedjanag toea.
Ia poenja kantor pernahnja kira kira di tengah tengah kota New York. Pagi pagi ia pergi ka sana dan waktoe malem ia poelang, sasoeda makan saorang diri sadja dalem roemah makan.
Dalem ia poenja kamar tidoer ada bebrapa peti oewng dizegel. Itoe peti peti dicement dalem tembok. Dalem itoe peti peti ia simpen ia poenja soerat soerat berharga dan harta benda, jang djadi ia poenja kegirangan.
