62
Sasoeda anaknja menikah, ia idoep saorang diri sadja. Tjoema Bob saorang jang ia ada sedikit pertjaja.
Pada itoe pagi, seperti biasa, Bob soeda bikin thee, jang toean Smith nanti poekoel sembilan minoem. Kemoedian itoe boedjang toea sediaken makan pagi dan sasoeda itoe ia ketok pintoe kamar madjikannja
Atas ketokan itoe tida ada dikasi djawaban. Tapi Bob tida djadi heran. Ia kombali dikamar makan dan menoenggoe di sana. Toean Smith masi sadja belon bangoen. la kombali ka pintoe kamarnja toean Smith dan pasang koepingnja, tapi tida ada kadengeran soeara barang sedikit.
„Toean Simth!“ Ia panggil dengen soeara keras.
Tida ada djawaban.
Sebab madjikannja selamanja koentji pintoe kamarnja, maka ia tida tjoba boeat boeka itoe pintoe, hanja ketok dan panggil lebih keras.
Hal begini belon pernah kedjadian. Bob djadi bingoeng.
Apa toean Smith brangkali soeda pergi dengen tida diliat oleh Bob ?
Kaloe betoel, itoe kamar tentoe tida di-koentji lagi.
Bob lantas poeter knopnja pintoe dari itoe kamar.
Betoel djoega itoe pintoe tida dikoentji, ia lantas sadja terboeka.
Tapi, baroe sadja Bob masoek dalem itoe kamar, lantas ia melompat moendoer dengen kaget.
Lantaran itoe pemandangan, jang mendadak tertampak di depan matanja, sasaat lamanja ia seperti djadi kakoe lantaran kaget.
Ia poenja madjikan terletak dalem tempat tidoernja dengen badan separo telandjang dan soeda tida bernjawa lagi.
