63
Antero tempat tidoer itoe dan badjoe jang menoetoep dadanja toean Smith, penoeh sama darah, jang telah mengalir djoega djato atas tikar bermadani.
Dalem kasedihannja jang soenggoeh soenggoeh, itoe boedjang toea hampirken itoe tempat tidoer, angkat madjikannja jang soeda djadi mait dan peloek serta tjioem itoe mait sembari menangis dan mengeloeh.
Tatkala itoe ia rasa badannja toean Smith soeda kakoe dan dingin, satoe tanda, bahoea madjikannja soeda djadi mait. Bob menangis seperti anak ketjil:
„Toean Smith!“ katanja dengen bertreak. „soenggoeh tjilaka besar! Toean Smith!“ . . . . Aer matanja jang kaloear dengen deres, bikin ia tida bisa bersoeara lagi.
Tatkala ia brenti menangis dan liat moeka jang soeda kakoe dari madjikannja, ia mengarti apa jang soeda terdjadi, 'sebab berbareng dengen itoe ia poen liat dadanja itoe mait.
Kemedja, jang menoetoep badannja itoe toean, njata sekali ada bekas potong di betoelan djantoeng.
Orang soeda boenoeh toean Smith!
Dengen amat kaget dan tida taoe lagi apa jang ia bikin atawa moesti bikin, itoe boedjang toea kaloear dari itoe kamar tidoer, dengen tida perhatiken, bahoea pakeannja kena darah. Pikirannja soeda ilang. Hatinja sanget terharoe.
Mendadak ia brenti bertindak lantaran dapat rasa takoet.
Kaloe seandenja si pemboenceh masi ada dalem roemah?. . . .
Ia taoe, madjikannja jang pegang koentji roemah, saban malem koentji sendiri pintoe moeka dan saben pagi boeka sendiri kaloe ia pergi ka kantornja.
Bagimana itoe pemboenoeh telah dateng dalem roemah?
