67
Sembari mendjerit ia berloetoet di samping mait ajanhnja.
,,Ajahkoe!" katanja dengen soeara tertahan, ,,ajahkoe jang baek!"
Bob dan itoe pengoeroes kamar toeroet menangis.
Alfred, jang roepanja djadi toeroet terharoe hatinja dan dengen moeka poetjet lantaran kaget, memberi salam pada orang orang jang ada dalem itoe kamar dan pergi ka tempat tidoer, di depan mana Marie ada berloetoet.
Ia tjoema meliat sabentar pada itoe mait dan lantas balikin blakang.
,,Ngeri betoel!" ia menggrendeng pada dokter jang berdiri didepannja. ,,Soenggoeh ngeri ! Bagimana soeda terdjadi ? Kapan ? Waktoe soeboeh ? Tapi Bob toch moesti taoe, siapa jang telah dateng disini.... Darahnja masi kloear dari itoe loeka . . . ."
,,Tida, boekan diwaktoe soeboeh, toean Goud. Menilik keadaannja itoe mait, itoe pemboenoean telah dilakoeken diwaktoe tengah malem," djawab itoe dokter.
,,Itoe pemboenoeh diwaktoe malem soeda semboeno dan menjerang pada korbannja diwaktoe tengah malem. Dengen satoe toesoekan sama piso ia bikin toean Smith djadi djatoh dalem tempat tidoer"
,Tapi Bob toch moesti denger treakan," kata Alfred lagi.
Itoe waktoe satoe njonja, jang pake pakean item, masoek dalem itoe kamar. Itoe njonja adanja Clotilde jang baroe menjoesoel madjikannja.
Ia poenja dateng roepanja ada membikin koerang senangnja toean Goud. Sasaat lamanja matanja doea orang itoe bertemoe sama satoe dengen laen. Clotilde teroes menoedjoe ka tempat tidoer dimana Marie berloetoet.
