69
IX
B O B
Dalem kamar mati ada soenji sekali.
Marie dan Alfred dengen diikoet oleh Clotilde dan pengoeroes kamar, baroe brangkat dari sitoe.
Kamar makan dirobah djadi kamar tempat ambil pengakoean
Dimedja makan jang besar telah doedoek toekang preksa mait De Vries dan ia poenja secretaris. Deket marika ada djoega inspecteur Bernard, jang teroes memandang pada itoe boedjang toea ..........
Dalem kamar diseblah, masi ada doea agent politie, jang menoenggoe datengnja kolonel Rogers.
,,Kaoe bernama Robbert Jansen dan soeda anem taon bekerdja dalem ini roemah, menoeroet soerat soerat, jang ini inspecteur telah ketemoeken dalem kaoe poenja kamar," kata De Vries pada Bob, jang djadi sanget heran, tatkala ia denger, orang telah bikin papreksaan dalem kamarnja dengen tida kasi taoe padanja lebih doeloe. ,,Tjara bagimana tadi pagi kaoe kloear dari ini roemah ? Apa pintoenja terboeka?"
,,Tida, toean. Pintoenja terkoentji."
,,Tadi pagi ini inspecteur soeda tetapken, bahoea djendela poen tida ada jang terboeka. Djadi sipemboenoeh bisa lari melaenken djalan pintoe. Siapa pegang koentjinja?"
,,Toean Goud tjeritaken padakoe, melaenken mertoeanja ada pegang itoe koentji dan ia sendiri koentji pintoe roemah."
,,Betoel."
,,Itoe koentji digantoeng seperti biasa dalem kamarnja madjikankoe. Dari sitoe akoe ambil itoe koentji
