83
tida idoep lagi. Kaoe moesti ambil poetoesan. Anakmoe nanti dikasi kombali, kaloe kaoe kasi itoe soerat padakoe.“
„Kaoe djoesta, djahanam!“ djawab Clotilde, jang kira Alfred tjoema bikin takoet, soepaja ia serahken itoe soerat kawin. „Nona Van den Broek ada saorang prempoean baek dan pantes dapet kapertjajaankoe. Ia tentoe tida serahken anakkoe padamoe.“
„Akoe kasi kaoe pilih. Tapi lekas ambil poetoesan, sekarang ini djoega! — Kaoe poenja anak nanti dikasi kombali, kaloe kaoe soeda bertjere sama akoe dan kasi kombali itoe soerat soerat padakoe. Akoe nanti kasi kaoe sadjoemblah oewang, kita poenja djalanan nanti terpisa dari satoe sama laen dan ini malem djoega kaoe moesti pergi dari ini roemah.......Kaoe liat.....akoe kesian sama kaoe.....“
Clotilde tida dengerken lagi.
Zonder bitjara apa apa ia lari ka pintoe.
Sabelonnja Alfred bisa tjegah, ia soeda ada di gang.
Lantaran goegoep Clotilde djadi ambil djalan salah. Ia kombali dan ambil djalan laen.
Kakinja sakit. la moesti pergi ka roemahnja itoe djanda, pada siapa ia telah pertjajaken anaknja, dan jang brangkali telah serahken anaknja itoe pada Alfred.
Achirnja ia sampe di djalanan ketjil, dimana ada terletak itoe roemah.
Ia inget betoel matjemnja itoe roemah dan maskipoen hari soeda gelap, toch ia aken bisa dapet tjari itoe roemah.
Lagi tida sebrapa meniet Clotilde sampe di roemahnja itoe djanda.....
