94
XII
GILA.
Esok harinja officier van justitie dateng pada njonja Goud boeat tania tentang tjara idoep dan kabiasaan kabiasaan dari ajahnja itoe njonja.
Maskipoen Marie merasa lebih segar, sasoeda satoe malem tidoer dengen senang, toch Alfred tida maoe idzinken itoe officier menanja ini itoe pada istrinja lantaran Marie sekarang telah djadi goegoep poela. Alfred menerangken, ia soeda kasi segala katerangan jang ia bisa kasi.
Robbert masi teroes ada dalem pendjara, maskipoen.belon ada didapet laen laen boekti boeat menjataken salahnja.
Clotilde soeda ada poela bersama sama Marie. Maskipoen ia tjoba sabisa bisanja, toch ia tida bisa semboeniken kasedihannja. Marie dapet liat dan menanja sebabnja, hingga Clotilde achirnja tjeritaken bahoea anaknja telah ilang. Ia tida tjeritaken siapa orangnja jang ia sangka soeda bawa lari itoe anak. Tapi ia soeda berniat tetap aken ketemoeken Alfied sabelonnja Rogers dateng dan aken lakoeken daja jang pengabisan soepaja Alfred kombaliken anaknja.
Prempoean pengoeroes kamar masoek dalem kamar. Inilah ada koetika jang baek aken tinggalken njonja Goud sabentar. Dengen tjepat Clotilde pergi ka kamarnja Alfred. Tatkala ia masoek, Alfred doedoek depan medja toelis dengen blakangnja mengadep pintoe.
Dengen tjepat ia simpen soerat soerat, jang ia pegang di tangannja dan berpaling.
Satoe sorot djahat kliatan di matanja.
„Apa kaoe dateng kasi taoe kaoe poenja poetoesan ?"
