-100-
dan memake hati djoedjoer, teroetama moesti perhatiken kaloe bertemoe sama satoe lawanan jang tanggoe, djangan loepa menjeboetken namanja sang goeroe, agar djangan sampe bertempoer sama orang dari golongan sendiri.
Lebih djaoe dikasi laoe djoega, semoewa kapala-kapala dari itoe tjabang sama sekali ada lima, jaitoe Tiang Bie Ong, Tjeng In Nikoh, Tay Pwee Hweeshio, Ong Tjeng Hong sendiri dan Tjio Mo Lodjin, serta loekisken djoega begimana romannja itoe ampat orang jang laennja, soepaja kaloe kamoedian kabetoelan dikatemoeken bisa dikenalin.
Biau Seng Liong dari Kangsee moelai brangkat bikin perdjalanan ka Hokkian tapi di sana ia tida beroentoeng bisa bertemoe sama Tiang Bie Ong, kerna ini djago kolot djoestroe pergi bikin perdjalanan ka laen tempat. Dari sana ia brangkat ka kwitang, dan koetika sampe di Samsoei ia denger namanja Ban Boe Tek jang terkenal sabagi satoe kapala boewaja dan djago ilmoe silat jang djempolan, laloe ia pergi ketemoeken dan adjak bertanding ilmoe silat, sesoedanja ia orang bertempoer doewa ratoes djoeroesan, Biauw Seng Liong mendapat kanjatahan bahoewa Ban Boe Tek poenja ilmoe silat ada dari tjabang laykee, tapi masi belon sampe di tingkatan jang paling tinggi, maka kaloe ia bertempoer teroes sama Ban Boe Tek, achirnja ia bisa mendapat kemenangan; tapi lantaran ia mendapet pesenan dari goeroenja djangan berlakoe sombong, maka ia minta soepaja itoe pertempoeran dibrentiken sadja, kemoedian poedji Ban Boe Tek poenja ilmoe kapandean silat jang tinggi, tapi dengen haloes ia bikin orang djadi mengarti bahoewa Ban Boe TeW poenja ilmoe kapandean masi belon sampe di tingkatan jang paling tinggi.
