-107-
pertjaja pada ini orang jang baroe sadja dikenal dan mengakoe mendjadi moeridnja iapoenja soesiok, tapi ia merasa tida ada halangannja boewat tjeritaken doedoeknja perkara jang sabetoelnja, jang sabegitoe djaoe menjangkoet pada Tjhio Tjoe Boen dan Phoa Boe Liang. Tapi prihal siapa sabetoelnja iapoenja diri dan siapa adanja iapoenja kawan-kawan, semoewanja ia tida maoe kasi taoe (hal mana ia sendiri poen tida taoe, sebab Lian Eng c. s. poen tida maoe kasi taoe, begitoe poen ia dan soedaranja soeda berboewat pada marika itoe).
Tapi Biauw Seng Liong poen tida maoe memaksa menanja, sebab ia merasa kalori dirinja masi belon bisa mendapat orang poenja kaperijajahan. Maka ia tjoema berkata sadja; „Sekarang akoe maoe mengoendjoek pada kaoe orang bahoewa akoe dengen satoeroesnja hati maoe membantoc pada kaoe orang poenja fihak, akoe aken teroes tinggal sama Ban Boe Tek boewat meliat koetika jang baek agar bisa membantoe apa jang akoe bisa; tjoema kaloe akoe perloe bertemoe sama kaoe orang, di mana akoe moesti dateng?"
„Di sini sadja", saoet Kong Liat; „tapi soeda tentoe sadja moesti di waktoe malem, sebab di waktoe siang kita tida bisa dateng ka sini."
„Nah, kaloe begitoe, baeklah," saoet Biauw Seng Liong. „Slamat malem, sampe kita bertemoe kombali."
Sahabisnja berkata begitoe, ia lantas balikin badannja dan berlaloe dengen tida menoleh lagi ka ka blakang. Tapi sasampenja di kantoor liat tay ia mendapat kanjatahan djikaloe Tjhio Tjoe Boen, Ban. Boe Tek dan laen-laennja, semoea soeda tida ada lagi di sitoe; sedang Phoa Boe Liang sekali poen dikasi katerangan jang masoek di akal bahoewa Seng Liong
