-108-
pergi kaloewar perloenja boewat menjoesoel pada itoe kawanan tetamoe malem, toch masi koerang pertjaja, hingga ia tida maoe kasi katerangan ka mana Tjhio Tjoe Boein dan laen-laennja soeda pergi. Ia tjoema oendang sadja soepaja Biauw Seng Liong menoenggoe di dalem iapoenja kantoor sampe Tjiho Tjoe Boen dan laen-laennja balik kombali.
Biauw Seng Liong poen merasa kaloe Phoa BoeLiang, boleh djadi djoega soeda dipesen oleh Tjhio Tjoe boen. tida perijaja dan menaro sangkahan djelek padanja, maka ia tida maoe mendesak teroes; tapi ia soeda ambil poetoesan pasti, bila ia tida bisa mendapet katerangan apa apa prihal Tjhio Tjoe Boen dan kawan-kawannja, ia poen tida berdiam lebih lama di dalem itoe kantoor, kerna ia sama sekali tida kenal pada Phoa Boe Liang, tambahan ia tida soeka sama ini ambtenaar kaparat.
Pada malem jang berikoetnja' Biauw Seng Liong koetika maoe kaloewar dari kantoornja liat lay, dengen memake djalan di atas genteng, mendadak ia menampak satoe bajangan itam, hingga ia mendjadi heran, bermoela ia mendoega kaloe sala-satoe dari iapoenja kawan sariket baroe jang dateng, entah boewat mengintip padanja atawa poen laen maksoed; tapi blakangan koetika itoe bajangan itam. menjamperin padanja ternjata orang itoe boekan laen dari Bang Tay Loei, hingga ia mendjadi girang sekali, sebab ia poen taoe kaloe ia ini ada saorang baek. djoedjoer dan adil, tida nanti maoe mendjadi kontjonja Ban Boe Tek dalem kadjahatan.
„Mari ikoet padakoe ka loewar," berbisik Bang Tay Loei, „sebab akoe maoe ada pembitjarahan jang sanget perloe.
