-111-
„Hahaha!" koenjoeng koenjoeng kadengeran soewaranja satoe orang tertawa besar, „ternjata memang benar kaoe berdoewa ada penghianat besar."
Biauw Seng Liong dan Bang Tay Loei djadi sangat terkedjoet koetika mendenger itoe omongan, dengen berbareng iaorang menjaboet goloknja dan bersedia boewat bertempoer. Tapi dalem saat itoe djoega kadengeran lagi itoe soewara berkata: „Penghianat boewat fihaknja orang orang djahat, tapi setia boewat kaadilan dan kabenaran!"
Ampir dalem sa'at itoe djoega ada lompat kaloear doewa orang dari tempat gelap, jang ternjata ada si kedok belang poetih itam dan si kedok sabelah poetih dan sabelah itam atawa lebih betoel Tan Kong Liat dan Tan Boe Liat.
IX.
Biauw Seng Liong dan Bang Tay Loei djadi sangat girang koetika mendapet taoe bahoewa itoe orang jang bitjara boekannja Tjhio Tjoe Boen atawa poen laen laen kontjonja, tapi ada itoe hiapkek jang memang iaorang maoe katemoeken.
„Marilah kita masoek ka dalem itoe lio roesak," kata Kong Liat, „di mana kita bisa bitjara dengen laloewasa, sebab tida baek bitjara di tempat terboeka seperti di sini."
Begitoelah itoe ampat orang laloe masoek ka dalem lio terseboet. Oleh kerna seringkali digoenaken oleh itoe kawanan hiapkek boewat berkoempoel, dalem itoe lio ada terdapat bebrapa toempoekan batoe bata jang seringkali digoenaken boewat berdoedoek oleh marika itoe, dan Kong Liat persilahken kadoewa tetamoenja boewat berdoeduek, sedang Boe Liat di soeroe berlakoe sabagi pengawal di moeloet pintoenja lio itoe.
