-114-
Begitoelah itoe ampat orang gaga dan djoedjoer. sekali poen berlaenan deradjat dan kadoedoekan, tapi lantaran mempoenjai haloean satoe, biar poen baroe sadja berkenalan satoe dengen laen, iaorang soeda diadi tjotjok dan saling merasa sympathie dengen keras.
Kamoedian iaorang berdamiken tjara bagimana moesti diperboewat terhadep pada itoe soeratnja Tjhio Tjoe Boen boewat Phoa Boe Liang, apa baek disampeken pada pada adresnja atawa bagimana. Tapi Kong Liat menjataken ia maoe menoenggoe doeloe sampe lima kawannja jang laen dateng, baroelah itoe oeroesan diambil poetoesan, sedang pendjagahan di dalem kantoornja iapoenja ajah, ia merasa perloe djoega mendapat bantoeannja marika itoe. hingga itoe soewal tida bisa dibitjaraken pada sabelonnja marika itoe dateng.
„Soenggoe heran sekali, tida sari-sarinja itoe lima kawan datengnja boleh begitoe laat," kata Boe Liat; „apa barangkali ini malem iaorang ada halangan dan tida bisa dateng?"
„Kita orang soeda lama dateng ka sini," kata satoe soewara; „tapi dari sebab kita tida menggangoe kaoe orang poenja pembitjarahan, maka kita menoenggoe doeloe sampe kaoe orang abis bitjara."
Berbareng dengen itoe masoek Lian Eng dengen diiringken oleh Lioe Eng, Lee Na, Lee Tjoe dan Giok Kay, jang sabagimana biasa ada dalem marika poenja penjamaran. Sekarang Kong Liat dan Boe Liat lantaran soeda memboeka resianja pada Seng Liat dan Tay Loei, maka iaorang kasi taoe djoega iaorang poenja kaadahan diri pada itoe lima kawan jarg tida dikenal siapa sabetoelnja marika itoe, kamoedian minta dengen hormat soepaja marika itoe soeka mengasi taoe iaorang poenja kaadahan diri jang sabetoelnja.
