-117-
„Tjihoe Boe Liang, akoe menoelis ini soerat perloenja maoe menanjaken kaoe poenja advies; lantaran itoe orang botjeng bogie tida maoe perdoeliken kaoe poenja permintahan, malah sabaliknja sengadja menggentjet padakoe, serta beslag djoega akoe poenja harta milik, apa tida baek akoe soeroean orang pergi ambil sadja djiwanja, soepaja ini oeroesan djadi semingkin koesoet dan gelap. Akoe menoenggoe tjihoe poenja kabar dengen salekasnja, sebab akoe maoe bikin beras ini oeroesan dengen tjepat."
Di bawahnja itoe soerat dipertandain tangan Tjhio Tjoe Boen dengen ditjap djoega sama penoelisnja poenja satoe tjap prive.
Oleh kerna itoe soerat di batja dengen soewara njaring, semoewa orang poen bisa denger.
„Soeda tjoekoep terang", kata Lee Na; „biar poen ia tida oendjoek terang siapa jang maoe diboenoeh, tapi dengen gampang bisa dimengarti siapa jang di maksoedken Sekarang kita boleh lantas pergi ka sana."
Letaknja Hong tho-tjoen kaloe dari iboe kota Kongtjioe sabaliknja ada lebih dekat dari pada Sip-Iie toen, maka satoe djam kamoedian iaorang soeda sampe di kampoeng terseboet. Telah dimoefaketin soepaja Bang Tay Loei jang masoek doeloean sabagi djoega tida ada terdjadi apa-apa dan maoe kasiken itoe soerat balesannja Boe Liang, jang sabetoelnja tida ada; tapi djikaloe Tjhio Tjoe Boen, Ban Boe Tek dan Thio Kioe Nio ada berkoempoel di satoe tempat, dengen lantas Kong Liat, Lian Eng, Biauw Seng Liong dan laen-laennja lompat toeroen dan memangkap pada marika itoe.
