-120-
toembak, toja, shatjee, toengket besi, thitjio dan sebaginja, dan iaorang menjerang pada itoe kawanan hiapkek sabagi djoega kerbo gila.
Tapi memang lebih doeloe soeda diatoer, Kong Liat teroes perhatiken pada Bati Boe Tek, Lian Eng bertanding teroes sama Thio Kioe Nio, Biauw Seng Liong menempoer Tjhio Tjoe Boen, dan Giok Kay meladenin Ong Hoei Houw, sedang jang laen-laennja melabrak pada itoe bebrapa toekang popio dan toekang-toekang poekoel, jang semoewanja tida mempoenjai ilmoe silat tinggi, salaennja mempoenjai kanekatan dan kaboewasan.
Oleh kerna djoemblanja ada djaoe lebih banjak dari marika itoe, boewat samentara waktoe Lioe Eng, Lee Na, Lee Tjoe Boe Liat dan Bang Tay Loei belon bisa poekoel moendoer pada itoe toekang-toekang popio dan toekang-toekang poekoel, disebabken iaorang tida maoe mengambil korban terlaloe banjak. Tapi blakangan dengen perlahan itoe kawanan toekang popio dan toekang poekoel bisa didesak dengen diloekai di bagian marika poenja toeboe jang tida berbahaja, hingga Lioe Eng, Lee Na dan laen-laennja terpaksa moesti loekain iaorang sampe roeboeh dengen loeka berat.
Kong Liat jang bertaroeng sama Ban Boe Tek, biar poen sabetoelnja Kong Liat ada lebih tinggi ilmoe silatnja, tapi dari sebab Boe Tek melawan dengen nekat dan mati-matian, hingga boewat samentara waktoe Kong Liat belon bisa roeboeken pada lawanannja. Begitoe poen Lian Eng jang bertempoer sama Thio Kioe nio; sedang Tjhio Tjoe Boen dengen gampang sadja bisa dideser oleh Biauw Seng Liong, hingga belon tjoekoep limapoeloeh djoeroesan Tjhio Tjoe Boen poenja napas soeda moelai empas-empis dan badannja mandi keringet.
