-123-
Di laen fihak itoe toekang toekang popio dan toekang toekang poekoel jang dikatjar oleh Bang Tay Loei, Boe Liat, Lioe Eng, Lee Na, dan Lee Tjoe, semoewa soeda koetjar katjir, jang maboer soeda maboer djaoe, jang mendapat loekaberat tinggal menggletak dengen merintih rintih, sedang jang mendapat, loeka enteng paksaken diri boewat berlari lari dengen berdjengit-djengit atawa poen pintjang pintjang.
Tida antara lama kamoedian Tjhio Tjoe Boen, Ban Boe Tek, Thio Kioe Nio dan Ong Hoei Houw semoewanja soeda teringkoes dengen keras, sedang bebrapa toekang poekoel jang tida kaboeroe lari lantaran pintjang kakinja, poen ditangkap dan diikat.
„Sekarang semoewa oeroesan soeda mendjadi beres, dan tinggal ini kawanan orang boesoek dikasi hoekoemannja jang satimpal sama iaorang poenja perboewatan," kata Liang Eng, „maka salekasnja kita moesti angkoet ini orang orang tawanan boewat dipasrahen pada pembesar dari ini district Hwan-gie, sebab akoe dan kawan-kawankoe maoe balik poelang.
„Itoe betoel sekali,', kata Kong Liat; berpaling pada iapoenja ade dan menambahken: „soedara akoe harap kaoe pergi kasi kabar pada Loei tikoan, soepaja ia mengirim orang dateng ka sini; tapi soeda tentoe sadja kaoe djangan pake lebih lama itoe kedok, ramboet dan djenggot palsoe.
Sahabisnja berkata begitoe ia sendiri jang lebih doeloe malepasken kedoknja b rikoet djoega ramboet dan djenggot palsoenja; hingga lantas tertampak moekanja satoe anak moeda jang tjakap dan gaga; bagi orang poenja kaheranan, koetika Boe Liat poen berboewat begitoe, orang menampak iapoenja moeka ada begitoe sama dengen Kong Liat, hingga seperti pinang dibela doewa.
