-126-
itoe iaorang taoe di mana tempat tinggalnja itoe lima sobat, sekali poen tadinja iaorang berkeras tida maoe mengasi taoe. Apa sebabnja iaorang mendadak merobah pikiran, itoelah barangkali pembatja bisa timbang sendiri, djika soeda pembatja sampe di archinja ini tjerita.
Doewa hari kamoedian sadari iaorang poenja perdjalanan ka Hong-tho-tjoen, Kong Liat kasi pikiran pada doewa soehengnja boewat pergi mengoerdjoengin pada Yo Lian Koei, Lioe Boen dan laen laennja, hal mana itoe doewa kawan satoedjoe, malah Boe Liat poen menjalaken maoe toeroet pergi.
Tapi pada waktoe iaorang sampe di roemahnja Yo Kok Hiong dan menanjaken Yo Lian Koei, Lioe Boen, Ong Kim Kay, Gin Kay dan Giok Kay, toewan roemah djadi tjelangap dan tida bisa mendjawab boewat sakoetika lamananja.
„Toewan Lian Koei dan Lioe Boen, katanja ada entjek poenja doewa poetra," kata Kong Liat, jang sateroesnja lantas toetoerken tjara bagimana iapoenja perhoeboengan dengen marika itoe.
Kok Hiong djadi mendoesin kaloe Lian Koei tentoe boekan lain dari Lian Eng Lioe Boen boekan laen dari Lioe Eng, sateroesnja Ong Kim Kay, Ong Gin Kay dan Ong Giok Kay tentoelah ada Ong Lee Na, Lee Tjoe, dan Giok Kay jang tida ganti nama. Bermoela Kok Hiong djadi goesar pada kadoewa poetrinja, tapi lantara menginget jang iaorang kerdja aken membela kaadilan, maka hatinja berbalik seneng.
„Kongtjoe soeda kena disesatken," kata ia achirnja, „sebab akoe tida mempoenjai anak lelaki, katjoewaji doewa anak prampoewan jang masing-masing bernama Lian Eng dan Lioe Eng, malah itoe tiga kawannja jang laennja djoega, ada doewa di antaranja bangsa prampoewan, jaitoe akoe poenja kaponakan, poetri-
