-52-
terpladjar, hatinja poen baek dan adil, maka ia djoega merasa tida satoedjoe sama perboewatannja Tjhio Tjoe Boen jang djahat, tapi dari sebab taoe soewaminja menanggoeng boedi besar pada Phoa Boe Liang, maka ia poen tida bisa menjega soewaminja tjampoer itoe perkara.
Tan Hong Bwee ada satoe gadis terpladjar dan beradat haloes, dari fihak iboe dan ajahnja ia dapatken djoega marika poenja tabeat jang baek dan adil, soeda tentoe sadja ia merasa sangat tida satoedjoe ajahnja tjampoer tangan dalem perKaranja Tjhio Tjoe Boen jang djahat dan bersalah; tapi sebagi anak jang berbakti dan bertabeat haloes, sama sekali ia tida maoe menjataken pikirannja, kerna ia poen ada taoe bahoewa ajahnja beroetang boedi besar pada Phoa Boe Liang. Tjoema sadja, biar poen begitoe, toch tida oeroeng ia ingin berdaja oepaja soepaja ajahnja djangan tjampoer itoe oeroesan jang melanggar keadilan.
Tatkala ajahnja masoek ka iapoenja kantoor boewat preksa soerat-soerat dienst. Tan Hong Bwee laloe pergi mentjari iapoenja doewa soedara lelaki.
Tan Hong Bwee ada mempoenjai doewa soedara lelaki jang perna toewa, jaitoe Kong Liat dan Boe Liat, sepasang anak jang dilahirkan kembar, itoe waktoe Kong-Liat dan Boe Liat, beroemoer doewa poeloeh satoe taon, sedang Hong Bwee baroe beroemoer delapan belas taon. Kaloe sang ade prampoewan ada soeka sekali sama ilmoe soerat, hingga oleh ajahnja dikasi gelaran lie-pok-soe atawa professor prampoewan, sabaliknja Kong Liat dan Boe Liat soeka sekali sama ilmoe silat. Sedari ketjil iaorang soeka sekali maen poekoelan, hingga di waktoe beroemoer lima belas taon sadja soeda tida ada lagi goeroe silat jang sanggoep mengadjar padanja Tatkala ajahnja baroe
