— 71 —
„Dengen sasoenggoenja salah sekali akoe soeda maoe menoeroetin sadja permintahannja Phoa Boe Liang," kata ia achirnja „Baroesan ia dateng mengadoe lagi prihal samalem ia disatroin oleh bebrapa tetamoe malem, dan satoe di antaranja telah mengantjam aken memboenoeh padanja, djika ia tida maoe tarik kombali iapoenja permintahan padakoe; sedang jang laen laennja gondol iapoenja oewang sadjoembla sapoeloeh riboe tail perak, berikoet isirinja poenja saantero barang perhiasan jang berharga Kamoedian Boe Liang mengobor padakoe boewat menangkap pada itoe tetamoe-tetamoe malem, lantaran maloe hati kombali akoe meloeloesken, dan baroesan koetika akoe soeroean Kong dji dan Boe dji pergi mengintip dan menangkap pada itoe tetamoe-tetamoe malem, biar poen achirnia iaorang menoeroet djoega, tapi boekannja dengen senang hati, kerna ia anggap ini oeroesan tida adil, Akoe soenggoe merasa maloe sekali, perboewatankoe sampe moesti kena ditjela oleh orang-orang jang lebih moeda."
„Ach, dengen sasoenggoenja djoega, soewamikoe, kaoe terlaloe kena dipengaroehin oleh kaoe poenja pengrasahan trima kasi, hingga belon perna menoelak segala permintahannja Phoa Boe Liang,saoet Lie-sie; „sedeng satoe kali ini iapoenja permintahan ada meliwatin wates, sebab bisa membikin kaoe djadi berboewat hal jang tida adil dan djoega melanggar maoenja oendang-oendang negri, Kong dji dan Boe dji jang tabeatnja adil, tida heran kaloe ia menjataken tida satoedjoe. Akoe rasa masi ada banjak tempo boewat kaoe oendoerken diri dan tarik poelang kaoe poenja perdjandjian dengen mengasi alesan jang masoek di akal."
