-92-
berlakoe keras terhadep pada sang anak jang bengal itoe; tapi blakangan lantaran meliat sang anak galang-goeloeng sama kawanan boewaja, dan saban-saban soeka menerbitken kaonaran, sang ajah lantas ambil tindakan keras, rangket itoe anak bengal dan rante kaki tangannja dengen dikerem dalem satoe kamar.
Soeda tentoe sadja sang istri jang soeka elonin sadja anaknja djadi tida soeka hati dan bikin riboet sama sang soewami; tapi satoe kali ini itoe sioepie kerasin hati dan pegang tegoe iapoenja tindakan, hingga tida maoe ladenin sang istri poenja tjomelan dan sikap jang menantang. Achirnja pada satoe malem Ban Boe Tek bisa melolosken diri dari itoe kamar toetoepan, semoewa slot rantenja telah diboeka dengen anak koentjinja, hingga terang sekali tentoe ada orang jang membantoein melepasken pada itoe anak bengal.
Itoe waktoe Ban Boe Tek baroe sadja beroemoer ampat belas taon, tapi dengen, satjara nekat itoe anak berlaloe dari kampoeng kalahirannja, sebab oewang bekalan ada dikasiken banjak sekali oleh iboenja. Dengen terloenta-loenta tida katentoean toedjoean, Ban Boe Tek sampe di Lian-san bilangan provincie Kwisay, di mana ia kena dibegal oleh sarombongan liauwio jang menjegat di djalanan sabelah bawahnja itoe goenoeng; tapi Ban Boe Tek biar poen masi moeda ada mempoenjai tenaga besar, di barengin djoega oleh iapoenja ilmoe kapandean silat jang tida bisa dikata djelek, maka itoe bebrapa belas liauwio jang menjegat padanja, semoewanja kena dilabrak sampe soengsang soembel, hingga ia berlaloe dari itoe tempat dengen pengrasahan sangat bangga, kerna ia soeda bisa kalahkan begitoe banjak brandal jang bersendjata lengkap. Tapi ia berdjalan baroe sadja kira
