— 111 —
sesama kampoeiignja, dengen begitoe, biarpoen kaoe poenja pakerdjahan tida mendapet hasil jang langsoeng, tapi bisa memoengoet hasil di hari kamoedian dengen setjara indirect.”
„Ja, betoel; tapi sekarang lantaran soeda dekat fadjar, akoe moesti boeroe-boeroe balik poelang ka roemah sekola, soepaja djangan menerbitken orang poenja katjoerigahan. Nah, sampe bertemoe kombali, istrikoe.”
„Ja, sampe sabentar malem kita bertemoe kombali,” saoet sang istri, „sebab pada djam sapoeloeh sabentar malem, akoe aken dateng mengoendjoengin kaoe di itoe roemah sekola.”
Boe Beng Hiap Kek manggoetken kapalanja dan menganterken iapoenja istri sampe di atas tembok kota, kamoedian ia balik kombali ka itoe roemah sekola dari koelawarga Tan. Di waktoe ia masoek ka dalem kamar, moelanja ia tida taoe jang moeridnja soeda dapet taoe iapoenja perboeatan, tapi blakangan lantaran saban-saban ia denger Tan Kie Hou berklisikan, lantas ia mengarti jang moeridnja soeda taoe ia pergi kaloear. itoelah sebab ia sengadja barengin itoe koetika boeat memboeka iapoenja resia pada moeridnja itoe.
Tan Kie Hou satelah mendenger tjeritanja iapoenja boedjang, Tan A Toa sampe di achirnja, djadi merasa girang sekali.
„Trima kasi boeat kaoe poenja kabaran, A Toa,” kata ia, „dan ini oewang doea tail perak boeat kaoe poenja oepah, jang kaoe boleh pergi goenaken boeat makan minoem dan menongkrong di waroeng thee; tapi lantaran ini hari akoe ada mempoenjai banjak pladjaran jang moesti diapalken, maka akoe tida bisa mengobrol lebih djaoe sama kaoe.”
