BOEKOE PERITOENGAN
MENOEROOT DARIE
YAK KIENG SIAN THIAN IK SO.
——○−★☆★−○——
Bolee hoendjook katerangan, Segala perkara njang beloem ka-njata-an, mangka inie die mengetiken darie atoornja peritoengan oetawa ada dobat-sobat njang soekak tanjak inie peritoengan.
Ka nomer satoe, boolee soeroe lepas doewa dadoe sekiean dapet matanja, oetawa lebie darie dlapan mata, boolee potong njang dlapan, lantas toelies sekian tinggalnja, mangka tradak lebie darie dlapan mata, boolee toelies ka-adanja sadja.
Ka nomer doewa, apa perkara njang die tanjak itoe tadie, boolee preksa die dalem merk pertanjakan, adanja dapet merk apa, die sietoe boolee moelai reken dalem PAT KWA, poeter pigie kanan, watesnja menoeroot njang soeda dapet mata dadoe itoe tadie, djiekalook reken soeda sampeek watesnja, boolee preksa die PAT KWA, dapet merk apa, dan die tengahnja PAT KWA, dapet nomer brapa bolee toelies lagie.
Ka nomer tiega, apa perkara njang tanjak itoe tadie, boolee preksa die dalem PAT KWA, adanja merk apa, die sietoe moelaij, reken lagie, watesnja djoega menoeroot njang soeda dapet matanja dadoe itoe tadie, mangka soeda abees reken, die PAT KWA, dapet merk apa, dan die tenganja PAT KWA, dapet nomer brapa, lantas boolee toelies lagie, pengabisan, mendjadie dapet tiega nomer, boolee preksa die dalem inie boekoe peritoengan, lantas dapet kateranganja, apa njang terseboot ija itoe ka-adanja.
