— 217 —
Dantes merasa telah ada bodo sekali, oleh kerna brani mengharep, bahoewa itoe Inspecteur nanti oeroes perkaranja, sebelon dateng di kota Parijs. Dari sebab Dantes itoe beringet, bahoewa Inspecteur itoe tida nanti bisa dateng di Parijs, kaloe satoe atawa doewa boelan belon berlaloe, maka lantaslah ija mendoega dengen mengharep, ijang orang nanti lepasken dia di dalem tempo tiga boelan. Tempo itoe tiga 'boelan soedah berlaloe, Dantes lantas mengharep nanti dapet kalepasannja di dalem tempo anem boelan; aken tetapi tempo ini anem boelan soedah berlaloe, dan Dantes hitoeng ija poenja goerat-goerat di tembok, ija lantas dapet taoe, ijang ija soedah menoenggoe sepoeloeh boelan setengah. Selama itoe tempo tida ada perobahan apa-apa di dalem halnja Dantes itoe, djoega tida sekali ada kabar apa-apa ijang senangken hatinja; kaloe ija menanja apa-rapa pada cipier, orang ini menjahoet sadja dengen gojang kepala. Sebab begitoe, djadilah Dantes itoe merasa koerang pertjaja pada ingetannja sendiri, dan ija lantas moelai pertjaja, bahoewa segala hal ijang ija telah inget, boekan telah ada dengen sebenernja, hanja telah ada di dalem impian sadja.
Sesoedah satoe tahon berlaloe, itoe Gouverneur dari toetoepan di benteng d'If dipindahken ka benteng lain dan bawa pindah ka sama bebrapa penggawe sebawahannja, dan pada penggawe-penggawe ini ada teritoeng djoega itoe djoeroe-koentji dari pendjaranja Dantes.
Gouverneur ijang baroe, tida maoe taoe nama-namanja orang toetoepan dan seboetken sadja orang-orang itoe dengen nomornja masing-masing poenja kamar atawa pendjara. Menoeroet ini atoeran, Edmond Dantes diseboet sadja si No. 34.
