— 219 —
kendatipoen itoe orang bisoe, ada membri rasa enak pada hatinja Dantes. Sebab begitoe maskipoen djarang disahoeti, tidalah loepoet Dantes soeka djoega mengomong, seperti ija sengadja berkata-kata aken denger soewaranja sendiri: Ija soedah tjoba mengomong sendiri-diri, aken tetapi soewaranja sendiri membri rasa kaget padanja; kerna boekan ija seorang gila.
Pada tempo belon ditoetoep, Dantes sering merasa mengkirik boeloe badannja, kaloe ija beringat pada kelakoeännja pendjahat-pendjahat di dalem toetoepan, sebegimana ijang ditjeritaken oleh orang ijang taoe; maski begitoe, sekarang ini Dantes ada merasa ingin aken ditoetoep sama orang-orang itoe soepaja bisa dapet lihat moekanja orang ijang lain dari pada moeka si djoeroe-koentji. Dantes ada rasa mengiri di dalem hati, kerna beringat bahoewa pendjahat-pendjahat itoe ada lebih beroentoeng dari padanja, kendatipoen kaki marika itoe ada terpegang dengen belokan: marika itoe poen ada berkoempoel dengen sesamanja; ijaorang ada bernapas di oedara beresih, dan boleh dapet melihat pada langit, sedeng Dantes ada sendirian sadja di kamar gelap di dalem tanah.
Pada soewatoe hari Dantes minta pada cipier, soepaja orang ini toeloeng minta pada Gouverneur, biar ija dibri temen, kendati siapa djoega adanja temen itoe.
Itoe cipier ada djoega merasa kasihan pada Dantes, maka ija sampeken djoega permintaän si No. 34 pada Gouverneur; tapi ini pembesar ijang berhati-hati senantiasa, ada mendoega bahoewa Dantes ada niatan aken terbitken keroesoehan atawa ada poenja niatan aken minggat dengen toeloengan satoe temen; sebab begitoe, ija tida kaboelken
