— 221 —
merasa takoet mati, sebab ija tida maoe djadi makanan ikan; sekarang ini sebab soedah tida poenja apa-apa ijang tertjinta olehnja, ija merasa ingin mati.
Setelah soedah dapet niatan aken memboenoeh diri, Dantes merasa senang sedikit dan tida oering-oeringan lagi. Ia makan sedikit sadja dan djarang sekali tidoer, djoega ija tida merasa terlaloe kesel seperti di hari-hari ijang telah laloe, sebab sekarang ija merasa, ijang ija boleh boewang badannja seperti boewangken pakean boesoek, kapan sadja ija soeka.
Ada doewa djalan aken Dantes memboenoeh diri: pertama, bikin tali dengen sapoetangan, dan menggantoeng dirinja dengen tali itoe pada djari-djari besi ijang ada pada lobang djalanan angin; kedoewa, djangan makan satoe apa, soepaja mati lantaran lapar. Djalan ijang pertama itoe tida disoekai oleh Dantes, kerna orang-orang pelajaran biasa kenaken hoekoeman gantoeng pada badjak-badjak laoet, ijang terpandang olehnja seperti orang-orang nadjis, sebab begitoe, Dantes tida maoe kenaken hoekoeman itoe pada dirinja sendiri; maka djadilah ija berniat sadja aken memboenoeh dirinja dengen menahan lapar, dan di itoe hari djoega ija lantas moelai bersoempah, ijang ija maoe mati lantaran lapar.
Selama ada terdjadi segala hal ijang ditjeritaken di atas ini, ampat tahon telah berlaloe. Pada achir tahon ijang kaämpat, Dantes berenti mengitoeng hari dan sigralah djoega ija tida taoe lagi tanggal-tanggal.
Dantes telah berniat, ijang djikaloe orang bawaïn ija makanan pada waktoe pagi dan sore, ija nanti boewangken itoe ka loewar djendela, soepaja cipier nanti kiraken ija makan itoe.
