— 226 —
sabentaran, tapi kemoedian lantas djoega ija teroesken kerdjanja: saändenja boekan satoe toekang, hanja satoe orang toetoepan ijang niat minggat, tentoe sekali ija nanti merasa takoet ketahoean, hingga ija lantas berenti kerdja, dan tida nanti moelai kerdja kombali, kaloe hari belon djadi malem.
Kemoedian lantas sadja Dantes itoe mengetok tiga kali di tembok itoe dengen satoe-batoe ijang ija dapet rontokken dari satoe podjok. Baroe ija mengetok satoe kali sadja, itoe boenji ijang terdenger olehnja, lantas berenti.
Dantes memasang koeping. Doewa djam telah berlaloe, tapi itoe soewara tembok ijang terkeroek-keroek tida kedengeran lagi.
Dengen harepan besar, Dantes lantas makan sepotong roti dan minoem sedikit ajer. Sampe di waktoe sore, belon djoega ada terdenger apa-apa; sampe pada besok pagi poen demikian.
„Njatalah orang itoe seorang toetoepan ijang niat minggat,” kata Dantes dengen girang.
Di dalem sepandjang hari Dantes memasang koeping, tapi tida dapet denger itoe boenji ijang terharep olehnja. Ija merasa goesar, oreh kerna itoe orang toetoepän ada terlaloe berhati ketjil.
Tiga hari telah berlaloe, tida djoega ada kedengeran apa-apa. Achir-achirnja pada satoe sore, Dantes tempelken koepingnja di tembok, laloe ija dapet denger kombali itoe boenji, tapi sekarang ada lain kedengerannja dan ada perlahan sekali. Sangetlah Dantes merasa girang, hingga hatinja djadi berdebar-debar.
Njata sekali ada orang menggali tembok di dalem kamar ijang terdamping. Sebab dapet harepan besar dan ingin
